ԵՊԲՀ. ԵՄ SAFEMED+ նախագծի հանդիպումը՝ բժշկական բուհում

Երևանի Մխիթար Հերացու անվան պետական բժշկական համալսարանում մեկնարկեց Եվրոպական Միության SAFEMED+ նախագծի եռօրյա հանդիպումը։

Միջոցառմանը բացման խոսքով հանդես եկավ ԵՊԲՀ միջազգային համագործակցության բաժնի պետ Աննա Ղազարյանը։

«Հենց սկզբում մենք բախվեցինք մի շարք մարտահրավերների՝ COVID-19 համավարակ և պատերազմ։ Բայց մեր SAFEMED+ ընտանիքը կանգուն մնաց և հաղթահարեց խոչընդոտները՝ շարունակելով հաջողությամբ իրագործել նախագծի նպատակները», - շեշտեց նա։

Ուսումնական աշխատանքների գծով պրոռեկտոր Լարիսա Ավետիսյանը, ողջունելով ներկաներին, նշեց․ «Շատ ուրախ եմ մեր հարյուրամյա համալսարանում ձեզ հյուրընկալելու առիթով։ Մի համալսարան, որտեղ սովորում է ավելի քան 8000 ուսանող, որոնց մեկ քառորդն արտասահմանցի ուսանողներ են 35 երկրից։ Համալսարանը բազմաթիվ միջազգային ծրագրեր է իրականացնում, և այդ նախագծերի շրջանակում ուրույն տեղն ունի SAFEMED+ նախագիծը, որը, կարող եմ ասել, շատ հաջողված է։ Հաջողված է, որովհետև նախագիծը դեռ չի ավարտվել (մենք մեկ տարի դեռևս աշխատելու ենք միասին), բայց արդեն լուրջ ներդրումներ ունի համալսարանի կրթական գործունեության մեջ», - ասաց պրոռեկտորը։

Առաջիկա տարվա ընթացքում, նրա խոսքով, բուհը դիմելու է «Բուժական գործ» կրթական ծրագրի միջազգային հավատարմագրմանը, և այս կտրվածքով շատ կարևոր տեղ ունի այս նախագիծը, որովհետև այն օգնեց գիտելիքների գնահատման ԵՊԲՀ համակարգում ներդնել OSCE (օբյեկտիվ կառուցվածքային կլինիկական քննության - Objective Structural Clinical Exams) ձևաչափը։

«Համալսարանի 5 աշխատակից անցել է վերապատրաստման դասընթացներ՝ ներկա գտնվելով նաև OSCE ձևաչափով անցկացված քննություններին։ 25 աշխատակից վերապատրաստվել է Վրաստանում, որտեղ արդեն մի քանի տարի կիրառվում է ձևաչափը։ Կարևոր վերապատրաստման դասընթացներ են անցկացվել նաև այստեղ՝ 9 կլինիկական ամբիոնի դասախոսների մասնակցությամբ»,-ավելացրեց Լարիսա Ավետիսյանը։

Դրան զուգահեռ, տեղեկացրեց պրոռեկտորը, համալսարանը ձեռնամուխ եղավ և արդեն  կարճ ժամանակահատվածում պատրաստեց 27 նոր սենյակ՝ հատուկ OSCE քննություններն անցկացնելու համար։

«Այս ամենի արդյունքում Գիտական խորհրդի որոշմամբ՝ այս տարի պետական քննական եռափուլ ամփոփիչ ատեստավորման մեկ փուլը կանցկացվի OSCE ձևաչափով։ Հետագայում մենք նպատակ ունենք քննական այս ձևաչափը կիրառել նաև մնացած կուրսերում», - ընդգծեց պրոռեկտոր Ավետիսյանը՝ շնորհակալություն հայտնելով ծրագրի ղեկավարներին տեսական և ֆինանսական աջակցության համար։  

Միջազգային գործունեության և արտաքին կապերի գծով պրոռեկտոր Երվանդ Սահակյանի խոսքով՝ բժշկական կրթության առջև այսօր ամբողջ աշխարհում դրվում են ավելի ու ավելի բարձր պահանջներ։

«Երբեմն այդ խնդիրների լուծումը մեկ առանձին համալսարանի համար դժվար է լինում, և միավորվում են համալսարաններ՝ իրենց փորձը փոխանակելու համար», - նշեց պրոռեկտորը՝ բարձր գնահատելով նախագծի մասնակից պետությունների համագործակցելու պատրաստակամությունը։

Հայաստանում Erasmus+ ծրագրի ազգային գրասենյակի ղեկավար Լանա Կառլովան բնորոշեց կոնսորցիումը՝ որպես եզակի։

«Ինը համալսարան 6 երկրից մասնակցում է նախագծին։ Սա շատ բարդ, համալիր նախագիծ է, մեզ համար սա նոր ձևաչափ է և նոր վարքագիծ։ Մեզ անհրաժեշտ է լավ թիմ, որը կանցնի բոլոր դժվարությունների միջով՝ ներդնելով նոր հմտություններն ուսումնական գործընթացում», - ասաց  Լանա Կառլովան՝ շեշտելով նաև հանրային իրազեկվածության կարևորությունը։

Նախագծի համակարգող, Վրաստանի պետական բժշկական համալսարանի միջազգային կապերի գծով պրոռեկտոր Իա Ավալիանին գոհունակությամբ ընդգծեց, որ իր համար մեծ պատիվ է լինել շատ գեղեցիկ և հնագույն քաղաք Երևանում։

«Մեզ՝ վրացիներիս համար միշտ էլ մեծ պատիվ և ուրախություն է լինել Հայաստանում։ Աշխատելու ենք գրքի շուրջ, որը հետագայում կհիշեցնի OSCE ձևաչափով քննությունների անցկացման մասին։ Erasmus+ ծրագրի գլխավոր նպատակն արդեն իրագործվել է․ մենք ստեղծել ենք մեծ թիմ՝ մեծ ընտանիք, որն արդյունավետորեն աշխատում է», - հավելեց նա։

Իա Ավալիանին հանդիպեց նաև ԵՊԲՀ ռեկտոր Արմեն Մուրադյանի հետ։

«Մեծ հպարտություն է համագործակցել Ձեզ հետ SAFEMED+ նախագծի շրջանակում։ Մեր համալսարանը փորձում է մշտապես համապատասխանել միջազգայնորեն ընդունված չափանիշներին։ Թույլ տվե՛ք հայտնել մեր լիակատար աջակցությունը Ձեր բոլոր նախաձեռնություններին», - ասաց ռեկտորը։

Իա Ավալիանին հայտնեց, որ նախագծի հաջորդ հանդիպումը կկայանա հունիսին՝ Լիտվայի մայրաքաղաք Վիլնյուսում, իսկ հոկտեմբերին Թբիլիսիում կկայանա նախագծի եզրափակիչ հանդիպումը, որտեղ էլ կներկայացվի համատեղ ջանքերով գրված գրքի վերջնական տարբերակը։

Նշենք, որ SAFEMED+ նախագծի շրջանակում բժշկական բուհի արտասահմանյան գործընկերներն են Թբիլիսիի բժշկական ակադեմիան (Վրաստան), Սանտիագո դե Կոմպոստելայի համալսարանը (Իսպանիա), Կատանիայի համալսարանը (Իտալիա), Վիլնյուսի համալսարանը (Լիտվա), Թբիլիսիի պետական բժշկական համալսարանը (Վրաստան), Ուկրաինայի բարձրագույն պետական կրթական հաստատության «Բուկովինյան պետական բժշկական համալսարանը» (Ուկրաինա), Ուկրաինայի առողջապահության նախարարության Իվան Հորբաչեվսկի Տերնոպիլի ազգային բժշկական համալսարանը (Ուկրաինա):

SAFEMED+ նախագիծն իրականացվում է Erasmus+ ծրագրի շրջանակում և ֆինանսավորվում է Եվրոպական հանձնաժողովի կողմից: Նախագծի նպատակն է բարելավել Հայաստանի, Վրաստանի և Ուկրաինայի բժշկական կրթության որակը՝ իրականացնելով հմտությունների վրա հիմնված բժշկական կրթության ծրագրային ռեֆորմ, ներառյալ օբյեկտիվ կառուցվածքային կլինիկական քննության ներդնումը (OSCE - Objective Structural Clinical Exams), ինչպես նաև համալրել բուհերի ուսումնական սիմուլյացիոն կենտրոնի բժշկական սիմուլյացիոն սարքավորումները:

Նախագիծը համակարգում է Թբիլիսիի բժշկական ակադեմիան, իսկ եվրոպական գործընկերներն ապահովում են հետևողական մոտեցում՝ հիմնված կառավարման լայն փորձի վրա, և օգնում են ստանդարտացնել գործընթացները, գործիքակազմն ու հմտությունները: Նախագծի շրջանակում ԵՊԲՀ-ին տրամադրվել է 43,000 եվրո գումար, որով ձեռք են բերվել նոր սիմուլյատորներ՝ ուսանողների կողմից զարկերակային պուլսի ցուցանիշների ուսումնասիրման և որովայնի շոշափման հմտությունները բարելավելու նպատակով:

Այն մեկնարկել է 2020 թվականին և ավարտվելու է 2023 թվականին: Մինչ այժմ կազմակերպվել են դասընթացներ Ուկրաինայի Տերնոպիլի բժշկական համալսարանում՝ ծրագրային համապատասխան մոդիֆիկացիաների վերաբերյալ, Իտալիայի Կատանիայի համալսարանում՝ կլինիկական սցենարների մշակման և գնահատման վերաբերյալ, իսկ Սանտիագո դե Կոմպոստելա համալսարանում արևելյան գործընկեր բուհերը՝ որպես դիտորդ, մասնակցել են OSCE քննության անցկացմանը:

Տպագրվելու է ձեռնարկ, որտեղ նախագծի մասնակից յուրաքանչյուր բուհ ներկայացնելու է OSCЕ քննության սցենարներ (կլինիկական դեպք):

Նախագծի իրականացումը կարևորագույն գործոններից է բուհի միջազգայնացման գործընթացում: Այս տարի ԵՊԲՀ պետական ավարտական քննություններում կընդլայնվի օբյեկտիվ կառուցվածքային կլինիկական քննության  ձևաչափը, կգնահատվեն նաև կլինիկական դեպքերի հիման վրա ուսումնական սիմուլյացիոն կենտրոնում առկա սիմուլյատորների կիրառման միջոցով ուսանողների ցուցաբերած գործնական հմտությունները:

Հարցեր, պատասխաններ, մեկնաբանություններ